[CPD_READS_THIS] លោកបណ្ឌិតហ៊ុនម៉ាណែតបានថ្លែងអំណរគុណដល់ប្រជាពលរដ្ឋនៅទូទាំងប្រទេសដែលបានផ្តល់នូវភាពជឿជាក់លើគណបក្សប្រជាជនកម្ពុជា និងសម្តេចតេជោ ហ៊ុន សែន ជាប្រធានគណបក្សតាមរយៈការផ្តល់ជូននូវសន្លឹកឆ្នាតគាំទ្រដ៏ច្រើនសន្ធឹកសន្ធាប់លើសលប់ ក្នុងការបោះឆ្នាតជ្រើសរើសក្រុមប្រឹក្សាឃុំសង្កាត់អាណតិ្តទី ៥ ដែលបានប្រព្រឹត្តទៅនាពេលថ្មីៗនេះស្របតាមគោលការណ៍លទ្ធិប្រជាធិបតេយ្យ។
លោកថ្លែងបន្តថា នេះគឺជាសក្ខីភាពបញ្ជាក់យ៉ាងច្បាស់ថាពលរដ្ឋជាម្ចាស់ស្រុកបានមើលឃើញអំពីកិច្ចខិតខំប្រឹងប្រែងរបស់ថ្នាក់ដឹកនាំសមាជិកសមាជិកាគណបក្សប្រជាជនកម្ពុជាគ្រប់លំដាប់ថ្នាក់ក្នុងការបម្រើដោយពុំគិតពីការនឿយហត់ព្រមទាំងបូជាលះបង់ដោយប្រទ្បូកក្នុងគ្រោះថ្នាក់និងការលំបាកគ្រប់សព្វបែបយ៉ាង ជាពិសេសក្នុងដំណាក់កាលប្រយុទ្ធនឹងជំងឺកូវីដ-១៩ ដើម្បីការពារអាយុជីវិតប្រជាពលរដ្ឋនិងស្ថិរភាពសេដ្ឋកិច្ច-សង្គមធានាបាននូវភាពសុខុដុមរមនាជូនសង្គមជាតិនិងប្រជាជន។ បន្តទៅមុខទៀតគណបក្សប្រជាជនកម្ពុជាក៏បានប្តេជ្ញាចិត្តខិតខំបម្រីប្រជាពលរដ្ឋឱ្យកាន់តែខ្លាំងក្លាថែមទៀតដើម្បីរួមគ្នាថែរក្សាកសាងអភិវឌ្ឍនកម្ពុជាឱ្យកាន់តែរុងរឿងនិងស្ថិតស្ថេរយូអង្វែងតរៀងទៅសម្រាប់កូនចៅជំនាន់ក្រោយៗទៀត។
ការថ្លែងអំណរគុណនេះ ក្នុងពិធីសម្ពោធបើកឱ្យដំណើរការជាផ្លូវការនូវឡប្រព្រឹត្តកម្មសំណល់វេជ្ជសាស្ត្រចំនួនប្រាំខេត្តរបស់ក្រុមហ៊ុនប៊ុនលាងលីគ្លូប៊លឯ.កស្ថិតក្នុងភូមិចំការគួយឃុំព្រៃពួចស្រុកអង្គស្នួលខេត្តកណ្តាលកាលពីព្រឹកថ្ងៃទី១០ខែមិថុនាឆ្នាំ២០២២។
លោកបណ្ឌិត ហ៊ុន ម៉ាណែត បានបញ្ជាក់ថា រាជរដ្ឋាភិបាលកម្ពុជាតែងបានចាត់ទុកវិស័យឯកជន គឺជាក្រុមប្រតិបត្តិករជាក់ស្ដែង នៃការអភិវឌ្ឍរីកចម្រើនរបស់ប្រទេសជាតិ ។ វិស័យឯកជនគឺជាប្រភពដ៏ធំធេងមួយនៃការវិនិយោគក្នុងការជម្រុញវឌ្ឍនភាពផ្នែកសង្គម និងសេដ្ឋកិច្ច ឱ្យកាន់តែរីកចម្រើននិងមានភាពច្នៃប្រឌិតប្រកបដោយចីរភាព ហើយក៏ជាដៃគូសំខាន់មួយដែលមិនអាចខ្វះបាននៅក្នុងការលើកកម្ពស់សុខភាពសាធារណៈ និងសុខុមាលភាពរបស់ប្រជាពលរដ្ឋ។មួយវិញទៀតសុខភាពគឺជាទ្រព្យធនដ៏មានតម្លៃមិនអាចខ្វះបាននៅក្នុងដំណើរការអភិវឌ្ឍសង្គម-សេដ្ឋកិច្ចកម្ពុជាជាពិសេសការទ្រទ្រង់នូវស្ថិរភាពនៃកំណើនសេដ្ឋកិច្ចជាតិ,ការកាត់បន្ថយភាពក្រីក្រនិងភាពប្រកួតប្រជែងរបស់កម្ពុជា ។ ផ្តើមចេញពីគោលគំនិតទាំងនេះរាជរដ្ឋាភិបាលតែងបានខិតខំបង្កើនធនធាននិងកិច្ចសហប្រតិបត្តិការកៀរគរជំនួយជាតិ និងដៃគូអភិវឌ្ឍអន្តរជាតិជាពិសេសការបើកទូលាយឱ្យមានការចូលរួមពីវិស័យឯកជនដើម្បីជំរុញការអភិវឌ្ឍហេដ្ឋារចនាសម្ព័ន្ធជាមូលដ្ឋាននៃប្រព័ន្ធសុខាភិបាលរួមមានការកសាងហេដ្ឋារចនាសម្ព័ន្ធ,ការបណ្តុះបណ្តាលធនធានមនុស្ស,ការបំពាក់ឧបករណ៍បរិក្ខារហើយជាក់ស្តែងគឺការគ្រប់គ្រងសំណល់វេជ្ជសាស្ត្រនេះជាដើមដែលម្រើឱ្យដល់ការផ្តល់សេវាសុខាភិបាលប្រកបដោយគុណភាពនៅទូទាំងប្រទេស។
ជាមួយគ្នានេះ លោកបណ្ឌិត ហ៊ុន ម៉ាណែ តក៏បានចូលរួមអបអរសាទរចំពោះការសម្ពោធបើកឱ្យដំណើរការជាផ្លូវការនូវឡប្រព្រឹត្តកម្មសំណល់វេជ្ជសាស្ត្ររបស់ក្រុម ហ៊ុនប៊ុនលាងលីគ្លូប៊ល នាឱកាសនេះ ដើម្បីធ្វើការការប្រមូលគ្រប់គ្រងនិងប្រព្រឹត្តកម្មសំណល់វេជ្ជសាស្ត្រដោយនៅក្នុងដំណាក់កាលទី១នេះក្រុមហ៊ុនបានសាងសង់ដំឡើងនិងបានឈានដល់ការបើកដំណើរការទីតាំងឡប្រព្រឹត្តកម្មសំណល់វេជ្ជសាស្ត្ររហូតដល់ប្រាំកន្លែងរួមមានខេត្តកណ្តាលកំពតត្បូងឃ្មុំបន្ទាយមានជ័យនិងខេត្តស្ទឹងត្រែង ។ ទីតាំងទាំងប្រាំនេះក៏មានលទ្ធភាពផ្តល់សេវាកម្មគ្រប់ដណ្តាប់បណ្តាខេត្តជាច្រើននៅជុំវិញផងដែរ ។ មិនត្រឹមតែប៉ុណ្ណោះក្នុងផែនការបន្ទាប់ក្រុមហ៊ុនក៏មានគម្រោងពង្រីកអាជីវកម្មដោយនឹងសាងសង់ទីតាំងនិងដំឡើងឡប្រព្រឹត្តកម្មសំណល់វេជ្ជសាស្ត្របន្ថែមទៀតឱ្យបានគ្រប់២៤ខេត្តនៅទូទាំងប្រទេសទៀតផង ។
