[CPD_READS_THIS] សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានអញ្ជើញចូលរួមក្នុងពិធីក្រុងពាលី និងសំណេះសំណាលជាមួយក្រុមការងារថតខ្សែភាពយន្តភាគ រឿងកូនប្រុសក្រោមពន្លឺព្រះចន្ទពេញបូណ៌មីនាព្រឹកថ្ងៃ ចន្ទ ខែមិគសិរ ឆ្នាំឆ្លូវ ត្រីស័ក ពុទ្ធសករាជ ២៥៦៥ ត្រូវនឹងថ្ងៃទី ១៣ ខែ ធ្នូ ឆ្នាំ២០២១។
ខ្សែភាគយន្តភាគខ្នាតធំ រឿងកូនប្រុសក្រោមពន្លឺព្រះចន្ទពេញបូណ៌មីដែលជាភាពយន្តប្រវត្តិសាស្ត្រឆ្លុះបញ្ចាំងពីជីវិតពិតៗរបស់សម្តេចតេជោ និងសម្តេចកិត្តិព្រឹទ្ធបណ្ឌិត ដែលជាកុលបុត្រដ៏ឆ្នើមទាំងទ្វេក្នុងការតស៊ូសង្គ្រោះជាតិមាតុភូមិនិងប្រជាជនកម្ពុជាឱ្យរួចផុតពីរបបយង់ឃ្នងប្រល័យពូជសាសន៍ ប៉ុល ពត។ ក្រោយទទួលបានការអនុញ្ញាតដ៏ខ្ពង់ខ្ពស់ពីសម្តេចតេជោនាយករដ្ឋមន្ត្រី គណៈកម្មការបានជ្រើសរើសអ្នកនិពន្ធចំនួន៥រូបដើម្បីរៀបចំកែសម្រួលខ្លឹមសារអត្ថបទនិពន្ធ ល្ខោនវិទ្យុ ទៅជាអត្ថបទនិពន្ធភាពយន្តសរុបមាន៤៤ភាគ ស្មើនឹង៦៥៣ឆាក។បន្ទាប់ពីបញ្ចប់ការងារនោះ គណៈកម្មការបានបង្កើតក្រុមការងារមួយធ្វើការពិនិត្យ កែលម្អ ដោយបន្សីនឹងសាច់រឿងឱ្យស្របទៅនឹងបរិបទសម័យកាល។ដើម្បីក្តាប់បានពីកត្តាប្រវត្តិសាស្ត្រ និងភូមិសាស្ត្រតួអង្គសំខាន់ៗពាក់ព័ន្ធ ក្រុមការងារតែងតែស្នើសុំប្រឹក្សាយោបល់ពីទីប្រឹក្សារបស់គណៈកម្មការជាញឹកញាប់ ដើម្បីជាការបំពេញនូវកង្វះខាតនិងប្រសិទ្ធភាពក្នុងការអនុវត្តផលិត។ក្រុមការងារគ្រប់គ្រងការផលិតបានចុះសិក្សាពិនិត្យជ្រើសរើសទីតាំងសម្រាប់ថតចំនួន១០២ទីតាំងដែលស្ថិតនៅក្នុងខេត្តកំពង់ធំ កំពង់ចាម ត្បូងឃ្មុំ កំពង់ស្ពឺ និងរាជធានីភ្នំពេញ ដើម្បីរៀបចំតុបតែងបន្ថែមជាទីតាំងថត ឱ្យស្របនឹងបរិយាកាស ស្ថានភាពភូមិសាស្ត្រ និងជីវភាពរស់នៅនាសម័យកាលនោះ។លើសពីនោះទៅទៀតយោងតាមអនុសាសន៍ណែនាំដ៏ខ្ពង់ខ្ពស់របស់សម្តេចតេជោនាយករដ្ឋមន្ត្រី គណៈកម្មការបានរៀបចំសាងសង់បន្ទាយកោះថ្មបន្ទាយទ័ពលន់នល់នៅទន្លេបិទនិងភូមិប្រជាជននៅមជ្ឍមណ្ឌលហ្វឹកហ្វឺន បញ្ជាការដ្ឋានអង្គរក្ស (ភ្នំស្រង់) ដែលសំណង់ទាំងនោះមិនត្រឹមតែជាការសាងសង់សម្រាប់ថតប៉ុណ្ណោះទេ តែជាសំណង់ដែលមានលក្ខណៈរឹងមាំដើម្បីទុកជាទីតាំងប្រវត្តិសាស្ត្រក្នុងការសិក្សា ស្រាវជ្រាវរបស់សិក្ខាកាមបញ្ជាការដ្ឋានអង្គរក្ស និងកងយោធពលខេមរភូមិន្ទ។
យោងតាមរបាយការណ៍របស់ ឯកឧត្តម ហ៊ឹម សុទិត្យា រដ្ឋលេខាធិការក្រសួងពត៌មាន និងជាប្រធានគណៈកម្មការផលិតភាពយន្តភាគរឿងកូនប្រុសក្រោមពន្លឺព្រះចន្ទពេញបូណ៌មីបានឱ្យដឹងថាអនុវត្តតាមអនុសាសន៍ដ៏ខ្ពង់ខ្ពស់របស់ សម្តេចតេជោនិងសម្តេចកិត្តិព្រឹទ្ធបណ្ឌិត ក្រុមការងារបានជ្រើសរើសតួសម្តែងសំខាន់ៗចំនួន ១០៣នាក់ តួប្រជាជនយ៉ាងតិច៥០០នាក់ព្រមទាំងកម្លាំងអង្គរក្សចូលរួម៥០០នាក់ផ្សេងទៀត ដើម្បីចូលរួមសម្តែងក្នុងឈុតឆាកធំៗដូចជាឈុតឆាកនៃការប្រយុទ្ធ ការធ្វើបាតុកម្ម ការរៀបចំពិធីកំសាន្តបុណ្យចូលឆ្នាំជាដើម។
លោកជំទាវ ហ៊ុន ម៉ាណា អគ្គនាយិកា អគ្គនាយកដ្ឋានវិទ្យុ និងទូរទស្សន៍បាយ័ន ត្រូវបានបញ្ជាទិញរួចរាល់ក្រោមការដឹកនាំរបស់ឯកឧត្តម វ៉ាន់ ឆាល៍ជួន ក្នុងនោះក្រុមការងារបច្ចេកទេសថតបានធ្វើការហ្វឹកហាត់ ការប្រើប្រាស់សម្ភារៈបច្ចេកទេសទាំងនោះរួចរាល់ ព្រមទាំងធ្វើការថតសាកល្បងបានយ៉ាងស្ទាត់ជំនាញ។ ឯកឧត្តមប្រធានគណៈកម្មការបន្តថា តាមផែនការផលិតរបស់គណៈកម្មការ ការផលិត មានចំនួន៤៤ភាគប្រើរយៈពេល១២ខែកន្លះយ៉ាងតិច ហើយការកាត់តដំឡើងរូបភាព និងត្រូវបញ្ចប់មុនពាក់កណ្តាលឆ្នាំ២០២៣ខាងមុខ។
សម្តេចតេជោនាយករដ្ឋមន្ត្រី បានថ្លែងនូវការកោតសរសើរ និងវាយតម្លៃខ្ពស់ចំពោះក្រុមការងារគ្រប់ផ្នែកទាំងអស់ដែលបានខិតខំសំរិតសំរាំងចងក្រង កែលម្អខ្លឹមសារសាច់រឿង ដែលផ្តើមចេញពីល្ខោននិយាយមកកាន់ការផលិតភាពយន្តរឿងភាគ ការខិតខំរកតួសម្តែង ការសិក្សាស្រាវជ្រាវរកនូវសម្ភារៈយុទ្ធោបរណ៍ទីតាំងភូមិសាស្ត្រប្រវត្តិសាស្ត្រ ដើម្បីឈានទៅថតភាពយន្តភាគរឿងកូនប្រុសក្រោមពន្លឺព្រះចន្ទពេញបូណ៌មី នាពេលដ៏ខ្លីខាងមុខ។
សម្តេចតេជោមានប្រសាសន៍សង្កត់ធ្ងន់ថា រឿងកូនប្រុសក្រោមពន្លឺព្រះចន្ទពេញបូណ៌មីនេះមិនអាចចប់ត្រឹមតែ៤៤ភាគនោះទេវាអាចមានរយៈពេលវែងជាងនេះ ឬមួយយើងអាចផលិតជាភាពយន្តឯកសារដែលមានរយៈពេលវែងក៏អាចថាបានព្រោះដំណើរជីវិតបានឆ្លុះបញ្ចាំងពីជីវិតពិតៗរបស់សម្តេច និងសម្តេចកិត្តិព្រឹទ្ធបណ្ឌិតដែលជាកុលបុត្រដ៏ឆ្នើមទាំងទ្វេ ក្នុងការតស៊ូសង្គ្រោះជាតិមាតុភូមិនិងប្រជាជនកម្ពុជាឱ្យរួចផុតពីរបបយង់ឃ្នង ប្រល័យពូជសាសន៍ ប៉ុល ពត ការយកជីវិតធ្វើជាដើមទុន និងការឆ្លងកាត់ការធ្វើពលីជីវិតឆ្លងដែន ជាច្រើនរាប់មិនអស់ទៀត៕
