[CPD_READS_THIS] ក្នុងឱកាសសម្ពោធដាក់ឱ្យប្រើប្រាស់ជាផ្លូវការវិមានកីឡដ្ឋាននៃពហុកីឡដ្ឋានជាតិមរតកតេជោថ្មីៗកន្លងទៅនេះ សម្តេចតេជោ ហ៊ុន សែន បានថ្លែងអរគុណចំពោះជំនួយរបស់រដ្ឋាភិបាល និងប្រជាជនចិនធ្វើឱ្យសមិទ្ធផលពហុកីឡដ្ឋានជាតិ « មរតកតេជោ » នេះលេចជារូបរាងឡើង។ សម្តេចបានកោសសរសើរមិត្តចិន ដែលតែងគោរពដល់កម្ពុជាទោះបីខ្លួនជាអ្នកផ្តល់ជំនួយ និងផ្តល់លទ្ធភាពកម្ពុជាជាអ្នកជ្រើសរើសម៉ូតពហុកីឡដ្ឋាននេះ តាមការពេញចិត្តរបស់កម្ពុជា។
គោលការណ៍គ្រប់គ្រងពហុកីឡដ្ឋានជាតិ « មរតកតេជោ » ឈរលើមូលដ្ឋានគ្រឹះសំខាន់ៗ៥យ៉ាងដែលត្រូវបានលោករដ្ឋមន្ត្រីថោង ខុន ប្រកាសដាក់ចេញរួមមាន៖
១. រក្សាឱ្យបាននូវភាពរឹងមាំ គុណភាព សោភ័ណភាព និងភាពបៃតងនៃពហុកីឡដ្ឋានជាតិមរតកតេជោ ។
២. យកស្មារតីសន្សំសំចៃ កាត់បន្ថយរបៀបប្រើប្រាស់ខ្ជះខ្ជាយលើថាមពលទឹក ភ្លើង និងធនធានមនុស្សមិនចាំបាច់។
៣. រៀបចំផែនការកៀរគរស្វែងរកចំណូល តាមវិធីសាស្ត្រទីផ្សារកីឡា និងចលនូបត្ថម្ភកីឡា( Sport Marketing & Sponsorship )ពិសេសបង្កើតកម្មវិធីស្វែងរកចំណូល តាមព្រឹត្តការណ៍ប្រកួតកីឡា ថ្នាក់ជាតិ និងអន្តរជាតិគ្រប់រដូវកាលពេញមួយឆ្នាំ ជារៀងរាល់ឆ្នាំ ។
៤. រៀបចំបន្ថែមគុណតម្លៃស្តង់ដារបច្ចេកទេសទីលាន ប្រកួតកីឡាទាំងអស់ ក្នុងពហុកីឡជាតិ « មរតកតេជោ» ដើម្បីទាក់ទាញចំណាប់អារម្មណ៍ចលនាកីឡាពិភពលោកមកកម្ពុជា។
៥. ប្រែក្លាយពហុកីឡដ្ឋានជាតិមរតកតេជោ ផ្សារភ្ជាប់ជាមួយវិមានឈ្នះ ឈ្នះ រមណីយដ្ឋានសួនសត្វសាហ្វារីភ្នំពេញ, តារាងកូនហ្គោល Garden City និងតំបន់ជុំវិញ ជាមេដែក និងជានិមិត្តរូបគោលដៅទេសចរណ៍ដ៏ទាក់ទាញថ្មីមួយទៀតសម្រាប់រាជធានីភ្នំពេញ។
គូសបញ្ជាក់ថា វិមានកីឡដ្ឋាននៃពហុកីឡដ្ឋានជាតិ « មរតកតេជោ » នេះទទួលបានថវិកាជំនួយឥតសំណងសម្រាប់ការសាងសង់ពីរដ្ឋាភិបាលចិនក្នុងទំហំទឹកប្រាក់ប្រមាណ១៦០លានដុល្លារដែលអាចផ្ទុកអ្នកទស្សនាបានរហូតដល់៦ម៉ឺននាក់៕
