[CPD_READS_THIS] ខេត្តកណ្ដាល ៖ ឯកឧត្តម គង់ សោភ័ណ្ឌ អភិបាល នៃគណ:អភិបាលខេត្តកណ្តាល បានចាត់ទុក ព្រឹត្តិការណ៍កីឡាបាល់ទាត់ និងការសម្ដែងកីឡាមិត្តភាពគាំទ្រយុទ្ធនាការ Byond the games ដែលបានប្រព្រឹត្តិយ៉ាងអធិកអធមនាឱកាសនេះ គឺដើម្បីអបអរសាទរក្នុងការត្រៀមឆ្ពោះ ទៅកាន់ព្រឹត្តិការណ៍ជាប្រវត្តិសាស្ត្រ ដែលទង់ជាតិកម្ពុជានឹងអណ្ដែតឡើងប្រកបដោយមោទកភាព ក្នុងនាមជាប្រជាជាតិ ដែលមានអរិយធម៌ វប្បធម៌ ដ៏ល្បីរន្ទឺ និងចំណាស់មួយក្នុងសកលលោក ដែលនៅសល់តែ៦៣ថ្ងៃទៀតប៉ុណ្ណោះ កម្ពុជានឹងធ្វើជាម្ចាស់ផ្ទះរៀបចំការប្រកួតកីឡាស៊ីហ្គេម ( SEA Games) និងអាស៊ានប៉ារ៉ាហ្គេម (ASEAN Para Games) ដែលជាការប្រកួតកម្រិតអន្តរជាតិ ដ៏ធំនៅក្នុងព្រះរាជាណាចក្រកម្ពុជា ហើយនេះគឺជាកិត្តិយសជាប្រវត្តិសាស្ត្រមួយទៀត ក្នុងវិស័យ កីឡាដែលកម្ពុជារង់ចាំធ្វើជាម្ចាស់ផ្ទះអស់រយៈពេល ៦៤ ឆ្នាំមកហើយ។
ឯកឧត្តមអភិបាលខេត្តបានថ្លែងដូច្នេះ ក្នុងពិធីបើកការប្រកួតកីឡាបាល់ទាត់ពានរង្វាន់ “ឯកឧត្តម គង់ សោភ័ណ្ឌ – Kong Sophorn Cup” និងព្រឹត្តិការណ៍សម្ដែងកីឡាមិត្តភាពគាំទ្រយុទ្ធនាការ Beyond the Games ក្រោមមូលបទ “បេះដូងលោតក្នុងចង្វាក់តមួយ” នៅពហុកីឡាដ្ឋានខេត្ត កាលពីព្រឹកថ្ងៃទី៣ ខែមីនា ឆ្នាំ២០២៣ ដោយមានការចូលរួមពីមន្ត្រីរាជការ អភិបាលក្រុង-ស្រុក មន្ទីរជុំវិញខេត្ត កងកម្លាំងទាំង៣ សិស្សានុសិស្ស យុវជនកាយរិទ្ធ និងយុវជន ស.ស.យ.ក ខេត្តជាច្រើនរូប។
ឯកឧត្តមអភិបាលខេត្ត បានបញ្ជាក់ថា ព្រឹត្តិការណ៍នៃការប្រកួតកីឡាបាល់ទាត់ពានរង្វាន់ Kong_Sophorn Cup លើកទី២ ឆ្នាំ ២០២៣នេះ បានផ្ដល់ឱកាសល្អសម្រាប់ ការផ្លាស់ប្តូរបច្ចេកទេស និងបទពិសោធ ជួយបំផុសស្មារតីមហាជនឱ្យស្រឡាញ់គាំទ្រវិស័យកីឡា និងលើកកម្ពស់កិត្តិសព្ទកីឡារបស់ជាតិឱ្យកាន់តែល្បីល្បាញនៅលើឆាកអន្តរជាតិ តាមរយៈយុវជន យុវនារី ខេត្តកណ្តាល ដែលជាមនុស្សជំនាន់ក្រោយ ពោរពេញដោយសក្តានុពល ថាមពល ដែល បានយកវិស័យកីឡា ជាភាសាការទូតកសាងទំនាក់ទំនង ការពង្រឹងសាមគ្គីភាព និងមិត្តភាព ដែលការណ៍នេះបានរួមចំណែកដល់ការបង្កើនមូលធនសង្គម និងការសម្រេចបានសុខដុមនីយ កម្មក្នុងសង្គមជាតិ ។
បន្ថែមលើនេះឯកឧត្តមអភិបាលខេត្ត បានលើកទឹកចិត្តក្រុមកីឡាករ កីឡាការិនីទាំងអស់ ត្រូវបង្កើនសមត្ថភាព ហ្វឹកហាត់ អោយបានខ្លាំងក្លាថែមទៀត ត្រូវខិតខំអភិវឌ្ឍសមត្ថភាពរបស់ក្រុម និងខ្លួនឯងផ្ទាល់ អោយកាន់តែមានភាពរីកចំរើន និងពូកែដើម្បីទទួលបានជ័យជំនះក្នុងការប្រកួត។
សូមបញ្ជាក់ថា Beyond The Games គឺលើសពីកីឡា លើសពីការប្រកួត Beyond The Games គឺចង់បង្ហាញទៅកាន់សង្គមជាតិ និងពិភពលោកថា កីឡាផ្សាភ្ជាប់នឹងវប្បធម៌មរតកជាតិ, កីឡាផ្សារភ្ជាប់សន្តិភាព និងការអភិវឌ្ឍ, កីឡាផ្សារភ្ជាប់ស្មារតីសាមគ្គីភាព និងមិត្តភាព។
